唔呀！嘔呀！

話說前個周六(28/4)起，阿仔又疴又嘔，揭開腸胃炎既序幕抗戰近十日，終於戰勝病魔；呢兩日胃口大開，可喜可賀！

阿仔捱左十日，其實真係唔容易，瘦左三磅，係體重既十分之一。期間最慘既，肯定就係嘔到人都慌哂，因為喺頭四晚，晚晚都嘔一劑，有一晚仲係半夜四點，訓著覺黎嘔，攪到一床都係。

之後，由於怕怕既緣故，無論係食藥或食粥，佢都會喊住叫：「唔好呀，嘔呀！」

後來怕佢太驚，又見佢病，除左氹佢食野之外，都唔敢再逼佢做d咩。

點知，程況越來越嚴重，佢遇到所有唔鍾意既野，都會聯想到嘔；

「食藥喇！」「唔食呀，嘔呀！」

「食粥丫！」「唔食呀，嘔呀！」

「天氣乾燥，要搽Cream Cream呀！」「唔搽呀，嘔呀！」

聽到呢句，我地頂佢唔順：「嘔你個頭呀，乜都嘔？搽Cream Cream都嘔？」

後來，論到佢想食某d野，或玩某d玩具，就調番轉頭，

「爸爸，我想食蘋果呀！」「唔食呀，嘔呀！」(醫生話未好番唔食得。)

「爸爸，我想食糖糖呀！」「唔食呀，嘔呀！」

到e家，佢話會嘔既野，結果梗係冇嘔到喇！我地亦幫佢舒緩一下，話比佢聽原來只有唔舒服先至會嘔，平時就冇事。