呢期，阿仔好醒，
對著父母，佢講中文；
對著菲傭，佢講英文(單字)；
不過，尋日出左Camp，佢返到屋企，
菲姐姐正在露台晾衫，阿仔就好認真咁，隔住度玻璃門同佢講左呢句說話：
「姐姐，開 the door !」
後來經改正後，成功轉為 “姐姐, open the door."
語文真係要襯早學，佢真係好叻仔！
作者: waiwinglaiyee
笑
大仔發夢係咁笑，睇見都好開心。
弟弟呢期開始有反應，同佢玩佢識得笑！
睇見佢他開心既笑臉，已經好滿足。
飽哂！
反斗狗仔隊
近日有一好友買了一頭好狗，於是常常想著要帶阿仔去好友家中睇狗仔；
雖然仲未去到，但尋日在街邊看見一套戲，叫反斗狗仔隊，於是租番去比阿仔睇，
以為可以令一向鍾意動物既佢雀躍一點，點知事與願違，
開戲唔夠十分鐘，阿仔即係大聲叫：「好驚呀！」
事緣有一幕，反斗狗仔夾計將一個女人綁住，又跘跌一個男人，
阿仔睇見之後，就好驚狗，嚇到心慌慌，我地見狀梗係即刻停播喇。
阿仔成晚都呆哂，真係嚇親，佢仲將隻VCD放番入我個背囊度，表明驚驚，
唉，不嬲都知阿仔細膽，不過冇諗到會細成咁樣，
睇黎要等一排先好帶佢睇真狗咯。
醫院
今日下午呈禧將會到屯門醫院檢查耳仔，Yeah！
估唔到咁快就有期，希望冇事。
做父母，最希望的，無非是子女平安、健康。
加碼
弟弟呈禧呢期發力，繼上星期初飲奶由三安士升至四安士之後，
本周後勁凌厲，先挑戰四安半，然後挑戰五安士大關；
覺覺豬方面亦因而有所得益，若計算飲一安士奶訓一個鐘的話，
佢已經由每隔三小時擴展至每四小時飲一次，
距離自然而然地戒夜奶，又邁進了一大步了，
阿仔，我地既目標係，半夜要訓足六小時先起身食奶，
我一定會陪你達到呢個目標的，YEAH YEAH YEAH!!!
左耳入
經母嬰健康院檢查，弟弟呈禧的右耳聽力不合格，
兩星期後覆檢維持原判，需要轉介屯門醫院跟進，作進一步詳細檢查。
幸好，左耳測試合格，現名符其實"左耳入"，呵呵！
===
另外，呈豐喺學校午睡時間，期間躲在被窩裡，靜雞雞偷飲益力多，
最後衫同被都濕哂，成為全校老師之間的一時佳話。
阿仔講英文！
除左唱歌由A到 Z之外，近排發現阿仔原來識得好多英文字，好多次聽到佢講完之後，我同太太都不禁對望一下，搞到我地呆哂之後微微咀係度傻笑：
MONDAY, TUESDAY, WEDNESDAY, THURSDAY, FRIDAY, SATURDAY, SUNDAY
ELEPHANT, LION, TIGER, MONKEY, MOUSE, CAT, DOG, BUTTERFLY, BEE, BIRD,
CROCODILE, HIPPO, GIRAFFE, TURTLE, TURKEY, DINOSAUR,
XYLOPHONE, GUITAR, PIANO, BOOK, CAR, AMBULANCE, FIRE ENGINE,
BLUE, RED, YELLOW, GREEN, …
星期日，阿仔在教會忽然講左一句: “Wash the hand！" 聽見既人都呆哂！
果晚，阿姑媽來探佢，指著紅色的圖畫，問佢："What colour is it?"
阿仔答道: “RED!"
姑媽話，呢條係小學一年級程度既問題。
嘩！阿仔勁啊！(雖然佢唔識字母，但係起碼佢記得個音… )
太太之後就話：「唔擔心佢日後讀國際學校，入邊間都唔驚，如果有機會入既話。」
心裡面，我都係咁諗。
忽然間，我為呢個仔，覺得非常自豪，感謝神！
豐語錄(一)
個案一.
夜晚臨訓時，當看見弟弟被爸爸或媽咪抱著時，呈豐說：「爸爸，我想扮BB呀！」
個案二. 爸爸在屯門巿中心見到有很好吃的班夫，想買給呈豐食，問呈豐：「好似好好食咁喎，你食唔食呀？我買比你食丫！」
呈豐回答說：「唔買啦！屋企有提子包呀！」
個案三.
幼稚園有午睡時間，老師會叫小朋友瞓覺；
在晚上祈完禱之後，當爸爸同媽咪傾呈緊既時候，
呈豐叫道：「瞓覺，唔好講野！」
講完之後係咁傻笑。
個案四.
在一次駕車既時候，調低玻璃諗住整番好個倒後鏡，
呈豐同我講：「唔好(伸手出去)呀，警察叔叔拉你呀！」
依家講野要好小心，如果唔係就實捉蟲…
學前班家長日
明天 (9/6)是阿仔學前班家長日，
上學期兩歲幾，已經見過一次家長，依家下學期又見一次，
不過唔駛驚，基本上係每個小朋友都見，唔係個仔特別差，三歲就要見兩次家長。
係就死得咯…
返邊度？
有一件事一定要記低，差d忘記了，真係瘀到爆。
話說BB出院果日(21/5)，太太入左去嬰兒房接BB，我就响門口等，
在那門口，除了我在等之外，還有兩個人一男一女在等，
佢地又係等緊裡面某初生BB同某媽咪出院，佢地可能係爸爸同阿姨之類。
大家都等了一陣，那男人突然間問我：「返邊度？」
我呆了一呆，想了一想，被問及呢條咁既問題，真係有D扯火，
我保持鎮定和微笑，禮貌地回答：「返邊度？返新界囉。你地又返邊度丫？」
佢都答得好 “親切"：「新界就近啦，我地返中山。」
個男人可能見我個樣有D唔自然，於是補充左一句：「我地呢幾日見好多都係國內來的，反而香港人就唔多。」
之後，我笑笑便算：「係咩…」
…
佢地一走左，我即刻走去照下塊境，發覺個樣又真係好殘下，鬚又冇睇，衣著又…
自從入左呢行，真係衣著都唔同哂，話就話係踏實左，但其實真係涼到爆，唉！
唔知點講，我覺得簡直就係一次侮辱，隨之而來既係好多好多既思緒，涉及不同課題。
我情願佢問我「你邊度架？」好過問我「你返邊度？」
其實真係有D爆粗既衝動，係好耐好耐未有過既衝動。
內地孕婦來港產子對港人既影響，竟然係咁！
網站標題 