作者: waiwinglaiyee

唔知做乜，阿仔呢排成日都臨天光癩尿。

有一晚，阿仔話要同我一齊瞓，唔比我走，

我想了一想，同佢講：「唔得喎，你癩尿，我唔同得你一齊瞓喎。」

阿仔話：「唔緊要啦，我今晚唔癩架！」

我梗係唔信佢，於是同佢講：「唔得，你點知你癩唔癩尿啫，萬一你癩尿，我著唔切泳褲喎。」

8/3(日)下午，阿仔、太太和我參加了聖經朗誦比賽，分誦如下：

太：評判、各位家長、各位同學，大家好！今日我們所讀的經文是

仔：啟示錄22章1-5節

太：天使指給我看一道有生命水的河，

仔：它像水晶一樣清澈，

太：從上帝和羔羊的寶座那裏湧流出來，在城裏的大街中間流過。在河的兩岸，各有一棵生命樹，

仔：結出十二次果子，

太：每月結一次新果子；樹的葉子能用作醫治萬國的藥。

我：城裏不會再有咒詛，因為那裏會有上帝和羔羊的寶座，他的僕人要敬拜他。他們將目睹他
的面容，他的名必寫在他們的

仔：前額上。

我：那裏不再有黑夜，

仔：因此不需要燈光或太陽，

我：因為主上帝必光照他們，他們將永遠

一齊：執掌王權！

過程非常緊張，其中出現了猶疑和錯誤，所有原先的動作全部冇哂，當然落敗。不過唔緊要，最後都得到每位參賽者例必有的「嘉許狀」。

呢段經文練左幾個月，真係一段既難忘又溫馨既經歷，勝負完全冇所謂；在場十五隊，半數隊伍互相通水，志在親子。比賽結束，我們和阿仔去玩具反斗城進發，買玩具獎勵阿仔。

至於細仔，要等佢識講野再同佢參加；到時一家四口晚晚練習，又會係一件樂事。

希望阿仔永遠都記得這段同父母一起練習的經歷。

農曆新年，小朋友真的是開心到極點，

行花巿、買玩具、食糖果、逗利是、走來走去，每日都不用讀書，

真係太多太多快樂或有趣事情，列舉如下：

1. 年廿九一家人行花巿，細仔買左隻吹氣牛公仔，大仔行花巿買了一把劍，但因為把劍有一粒黑點竟然想唔要，在花巿哭鬧。(阿仔有潔癖，响屋企成日都話要抹Lego上面d塵，激死。)

2. 媽咪定下規矩，大仔每日只可以吃兩粒糖；嘩，真係太殘忍。

3. 年初二早上發現細仔發燒，於是帶左佢去睇醫生，夜晚嘔到一身都係。

4. 年初三去朋友xx屋企，佢屋企除左有一個大概啱啱滿月既BB女之外，仲養有一隻北京狗，細仔一入屋，見到隻狗就衝埋去，係咁摸隻狗個頭，一d都唔驚，真係「狼過xx隻狗」，半小時就响度上演一場人狗大戰，阻都阻唔住；大仔响側邊，不停大聲叫：「細佬！唔好呀，好危險呀！！」現場除左滿月既BB女之外，仲有一個兩歲幾既小男孩，佢對隻狗就冇興趣；不過，當一個叔叔攞左盒Thomas & Friends 既火車玩具出來之後，連佢都瘋癲埋。三個小男孩爭玩具，人在喊，狗在吠，十級混亂，破晒紀綠。

5. 年初四補左一日假，上午入左大埔探姑媽同表弟表妹，下午送細仔返左屋企瞓覺之後，我同大仔去左沙灘玩左一陣，希望响沙灘上行下會對佢隻「扁平足」有幫助，同佢一齊玩下水、擲石仔、拉大繩、吹波波、走來走去，都係一件樂事。

我同佢講：「爸爸聽日要返工喇！」

佢話：「新年唔駛返工喇！」

我就話：「新年放三日假咋，我放多左一日咯，聽日要返架啦！」

佢唔出聲，好似明明地咁。

到左今朝(年初五)，响屋企裡面，佢同工人姐姐講：「姐姐，新年得三日架咋，你幫我攞返晒d玩具出來啦！」呢個仔真係活學活用，有d計仔。

6. 細仔到五月就兩歲，到而家都係有d反常，佢坐响BB車度，一唔開心就拗腰再向後撞，成日用個頭撞向BB車；姑媽話佢可能要憑撞擊才去感覺到一d事情，我諗都係時候要搵d渠道，檢查一下呢種行為，冇事就冇事，有事都可以早d跟進。

阿仔响學校門口，仆親，額頭同個鼻損晒。

即刻第一時間抱起他，入去學校護理一番，止左血又止埋眼淚。

睇見佢個花面貓，真係呆晒。

星期日出席彭牧師安息禮拜，星期一火葬禮，心情甚是哀傷沉重。

這位牧者為後世留下了佳美的腳踪，但我心裡卻認為，這個模樣離我自己太遠…

莫說是現在年輕的我，我相信再過二三十年也不能至此境地；除了主耶穌，彭牧師仿如完美一樣…

…………………….

看著師母和她身旁的兩個女兒，我想起日後自己的葬禮，

我想著太太和兩個兒子站在那裡，神情哀痛，或者兒子會不停地哭，

仔細老婆嫩，每想到這裡，眼睛便模糊看不清楚了。

……………………..

像我這樣平凡的人，希望能成為別人的借鏡，事奉主不一定要出眾或完美的人…

我只希望忠心服事，又成為兒子的好父親，離別時沒有後悔。

每天早上，我都十分珍惜拖住兒子行路返學的時間。

我心中十分清楚，再過多兩三年，我們便會減少拖著手仔的時候和機會；於是，在早一段日子，我感嘆地跟他說：「兒子，現在你要拖多一點爸爸的手，等你大個仔便會少拖爸爸的手了。」

他看似明，又看似不明地說：「不會，我大個仔都可以拖著爸爸的手啊！」

我望著他，心裡酸了一酸，手裡拖得他更加緊。

靜了一會兒，我問他：「你看，你甚麼時候看過爸爸拖著爺爺的手呢？爸爸連看到爺爺的機會也很少呢。」

阿仔好似明多左一點。

我再問他：「你很喜歡拖爸爸的手嗎？」

兒子想也沒想，回答說：「喜歡，我第日都要拖著爸爸的手的。」

我雖知這不一定是事實，但心裡卻是十分感動。

阿仔十一月做三次花仔

2/11 青衣一天主教堂，不停咁慢慢行，未開機攝錄就幾乎行完。

8/11 沙田一基督教堂，媽咪冇帶攝錄機同埋影相機；阿仔負責捧住戒指，行第二，前面第一果個女仔派朱古力餅。聞說阿仔行到一半，開始失控，同兩旁人士說：「冇朱古力喎，冇喎，冇喎…」又嘗試將對結婚戒指比觀眾，大家梗係話唔要啦，都係唔係幾好意思，好在係童年無忌啫。 

16/11 上水一基督教堂，希望唔好有哈碌事情出現就好咯…

阿仔响肚疴緊既時候，坐响馬桶上面勁嘔，比佢嚇死；

醫生判定為腸胃炎，無需打針，但須曠課一天。