作者: waiwinglaiyee

對我來講，全世界最動聽既英文歌，

係由阿仔唱出，歌詞概略如下：

「A…B…C…D…E…G…G…」

實在係繞樑三日，百聽不厭！

要頒個金曲金獎比佢。

星期六，一家三口出街食早餐，

我見媽咪同阿仔著緊衫，於是爭取時間掃掃地，

說時遲，那時快，阿仔已經著完衫可以起行，

佢竟然走過黎，超大聲叫：「喂！！！」

接著繼續叫，「一！二！三！！！」

唔知幾時，學左媽咪平時催佢既方法，

笑死我地，我笑到起唔到身。

雖然佢不是講到太多野，但原來已經由一數至九，又識數ABC，

不過中間既數字同英文字母次序亂哂，

現階段梗係冇所謂啦，開心都來唔切。

阿仔呢期玩反叛，

爸爸媽媽講咩都好，佢例牌唱反調，

乜都加個「唔」字喺前頭。

「阿仔，皮膚好乾呀，要搽Cream Cream！」「唔搽Cream Cream。」

「阿仔，食飯飯啦！」「唔食飯飯。」

「阿仔，要飲水水咯！」「唔飲水水。」

不過，間中都有例外既。

「阿仔，食糖糖咯！」「‧‧‧食糖糖。」

今朝早，「阿仔，你賴屎呀。」「係呀，賴屎屎呀。」

近來阿仔做左判頭，幫佢阿爸同阿媽分工。

佢行街就剩係肯拖阿媽，兩個人舒舒服服咁行；

一到自動電梯就搵阿爸，自己驚驚，要阿爸抱抱上落電梯；

我覺得呢個分工唔係幾好，事關一離開電梯，一落地佢就即刻飛開阿爸要阿媽，

阿爸永遠都冇得同佢兩個人舒舒服服咁行，

抱住佢，好似擔泥就有份，Happy就冇份一樣，

惟有在上落完電梯之後攬住佢抱多一陣唔捨得放手，

但係佢e家廿幾三十磅，又點能夠抱得耐丫，

結果累得際，成隻手痺哂，

有時d野，實在真係唔到你唔放手！

今早送阿仔返學，班裡面只係得六個小朋友，好多人冇返學。

老師問我：「呈豐既鼻水好厲害喎，又有眼水，醫生點講呀？」

我答：「醫生話有d傷風，加鼻鼻有dd敏感啫。」

老師：「咁… 平日，如果唔返學，有冇人睇仔呀？」意思係話有病就唔好返學啦。

我扮傻咁答佢：「冇噃，小小鼻水啫… d藥差唔多食哂喇…

…或者我睇下聽日點啦，如果仲未好，就叫嫲嫲睇一日啦。」

老師一邊ee俄俄，一邊幫阿仔帶口罩，

為左吸引佢帶，老師仲貼左一張貼紙喺個口罩度，

貼紙上寫住：「優異獎。」

喂，老師，呢張貼紙，好…諷刺喎！

近日，除左「好！」之外，阿仔成日都講：「冇噃！」

話說阿仔鼻水流長，於是昨晚，我就同佢去睇醫生，

晚飯過後，想胃佢食藥，又驚佢唔肯，

於是問佢飲唔飲佢好鍾意飲既汁汁，佢梗係即刻就答「好！」

我同阿仔媽咪將D藥水加在萍果汁裡面，遞比佢；

然後我地就望住電視機，扮冇特別咁同佢講：「要飲哂它呀，唔好浪費呀。」

佢飲左一啖，依依喲喲自言自語細細聲：「有藥藥嫁」，

媽咪忍唔住笑左出來，我就差d連飯都噴出來；

最後我地唔理佢，佢就真係飲哂。

媽咪又話：「又係一次古惑鬥古惑。」

===

臨睡覺，老婆就已經睡著，

阿仔摸到我隻手有介指，又話要；

為免噪聲操身大細既媽咪，加上我常常希望滿足兒子的慈父心腸，

我就除左隻介指落黎，帶在他的小手上，

他亦緊執在手中，安然入睡。

一早起來，佢就梗係已經冇再渣住啦，

於是我就問佢一輪，兇下佢：「隻介指好重要嗰噃，唔可以唔見架，你放係邊呀？」

佢左看右看了一眼，on 車車，帶點迷惘的眼神，

直接回答：「冇噃！」仲好似好內疚咁忝！

隻介指，梗係搵得番啦！

搵返之後，佢又話要，

不過今次唔比 lu。

尋日阿仔兩件校服都污糟哂，結果尋晚要十點幾漏夜開機洗衫，然後半夜兩點幾起身晾衫。

到今朝，校服梗係未乾，於是用左一段時間用風筒吃乾。

搞左一輪，阿仔又唔肯搽Cream，轉頭又話要屙屎，坐痰罐又坐左好耐，結果又遲左出門口；

落到樓下，竟然發覺冇帶書包，

OH NO! 又要返轉頭。

說實話，父親唔易做。

有一件事一定要記錄下來。

1月1日到青衣某某朋友的家中聚舊，大伙兒帶同小朋友出來，

大朋友圍在一起閒聊，小朋友則在地上追逐玩樂。

後來開飯，阿仔同其他小朋友吃了一陣，便沒有耐性，又一起玩過。

及後，開始有人走了，熱鬧的場面漸漸靜下來。

枱上的食物又再成為吸引小朋友的美物，

由生果的出現起，阿仔一直坐定定，幾乎個人吃了起碼半磅提子，

之後到甜品，類似馬蹄糕既物件出現了，

阿仔梗係又話要食啦！當時除了果碟糕之外，成張枱只係得阿仔自己飲水果隻杯，

經典的場面就在這時出現：

阿仔手指指，依依丫丫指住碟糕話要食，

姨姨就同佢講：「未有碟喎，要等一等架！」

阿仔隨即望左望右，發覺真係冇碟，

於是就立即拿起自己隻杯，極速將水飲完，

右手將杯放低，遞給姨姨，

左手同時空手執住一件糕，擲落個杯裡面，

拿起杯來就要吃。

當場全部人呆哂！然後一齊笑起來。

阿仔能夠以迅雷不及掩耳之勢，迅速解決了沒有碟怎樣食的難題，只係兩秒既事，

佢完全明白姨姨話「冇碟」既意思，又能夠有秩序地先將水飲完，後將糕放入，

轉數之快，簡直就只有一個字去形容：醒！

哈哈！真係似足佢老豆！

今晚，阿仔喺度玩唔肯沖涼，

結果在廳中間「碰」的一聲，額頭仆在地上，

起左一幢超大的樓。

「碰」聲大到好似打樁咁，聽見都驚，嚇死我，

喊死咯…

昨天係老友既生日，可惜阿仔唔駛返學，老婆就要返工，嫲嫲又唔來睇孫，

結果就要我補左一日假，成日陪住阿仔玩。

我整日既任務，是要勁消耗佢既體力，等佢訓覺我就可以做自己既事。

早上十點幾，拿住張年票，諗住同阿仔落樓下濕地公園玩番轉，點知它星期二放假，

走番轉頭，去到一個足球場，裡面只有一個家庭，

有一個六歲既男孩自己踢波，佢阿媽就同一個一歲半既女孩走來走去，

於是同阿仔入去同個男仔踢波，讓阿仔走來走去，消耗一下佢既戰鬥力。

踢左幾個字，點知係我既戰鬥力被消耗哂，好彩個男仔既阿媽話bye bye，真係求之不得！

之後去商場諗住租套Bob-the-builder比阿仔睇，點知去極都去唔到，途中有幾個傻滑梯，

阿仔參與左兩個，又玩左一陣，去到商場又冇得租，冇開門，

結果在冒險樂園玩左一陣之後就坐輕鐵返屋企。

返到樓下，阿仔在輕鐵中回復不少戰鬥力，竟然仲要去會所玩，

好！殺你！奉陪到底。

玩左唔夠三個字，佢就話要返屋企，我既任務終於完成。

食完午餐，佢足足訓到媽咪放工番來，呵呵呵！

只可惜媽咪身體疲倦，所以唔想出去食飯，

惟有又錯失一次老友既生日飯局。

無論如何，祝您生日快樂，願望成真！

又祝我既願望成真！Yeah！