作者: waiwinglaiyee

今朝阿仔食早餐，食哂成碗通粉，

之後飲奶奶，飲了一半之後，跟住反轉隻杯，

倒到一地都係，我就係咁鬧，

佢就係咁講「對唔住爸爸」！

今日太太要返工，朝早得我同阿仔兩個，

服侍完佢食早餐之後，佢話要去"百佳"；

我諗住呢次正喇，有得去食一個豐富既早餐，

點知落到樓下，喺一個分义位果度，佢話要去"濕地公園"，

我呢位善解兒意既爸爸，於是就放棄左食豐富早餐既機會，

同佢走左轉濕地公園。

佢對濕地公園已經好熟路，仲帶住我行o忝，

佢每次去都係好開心，好雀躍，

見到佢開心，連我都開心埋，

挨餓都開心。

阿仔要睡在父母中間，

我同媽咪講，要小心佢半夜發惡夢，起飛腳亂咁踢踢親阿二，

果然全中，媽咪保護左阿二之餘，仲話我醒同埋完全明白阿仔！

呵呵，我係至明白阿仔的人。

阿仔尋晚半夜，自己喺度咭咭聲笑。

我比佢既笑聲噪醒左，聽見佢笑我都好開心；

之後就唔識開心… 因為訓唔返。

祝大家新年快樂、心想事成！

未信耶穌的，快快返教會，認識神！

已信耶穌的，快快跟隨主，經歷神！

今早一家人出外食早餐，辦年貨，

阿仔例牌拿一兩件小玩具跟身，今次一次過拿了兩駕小車及一隻烏龜。

食完早餐同阿仔去洗手間，為方便緣故，乘機叫阿仔將所有玩具比爸爸先，然後才幫佢小便及洗手。誰知一出洗手間，阿仔竟然逐件逐件問我取回，車車、車車，烏龜，搵佢做收數肯定冇問題。

之後去行花巿，見到玩具，於是買了一盒類似LEGO既物體給他；跟住看見氫氣球，於是又買了一個給他 (其實尋晚已經買了一個)。記得有一個買花既叔叔，要送一個風車比阿仔，阿仔取了過來，我當然教他不能拿別人的東西啦，於是阿仔好乖咁將風車物歸原主，仲講左好多句「謝謝叔叔」忝。

隨後太太買了兩盆花，我們便回到車上；阿仔一手拿著LEGO，波波又套在他的小手腕上，喺呢個時候，我問：「阿仔，車車同埋烏龜呢？」阿仔即時呆車車，剛才的三件寶物，已經不知遺失於何時何地之中，乜都冇哂！究竟在哪兒失掉呢？相信只能是一個謎。

返到屋企，阿仔將氫氣球當係排球咁打，結果爆左，冇埋。黃昏，阿仔訓醒覺覺豬，臨出門口去吃團年飯之時，佢突然間又話要烏龜，

「喂！今朝咪唔見左囉，唔好玩野喎！」

隨即事旦比佢揀過另外兩樣小玩具出街，

結果回家之前，又冇埋。

話說尋日阿仔去醫院見言語治療，言語治療師輕描淡寫地用了不同的遊戲，就已經令阿仔坐定定足足一小時。

阿仔既表現十分好，大部份既遊戲活動都做到，砌圖、辨認物件、配對幾乎完全冇難度，一字記之曰──掂！

不過，有d難度高d既，例如穿珠仔就穿唔掂，叫剪紙佢就say NO，都係安全起見啫。

至於呢次檢查既重點，即係說話方面，都係冇得頂呀；治療師大概半年前喺一次坐座見過佢，今次佢形容，阿仔在這半年裡，發力追了別人大約一年既路程，講多左好多，呢個係好大既進步。

只不過，到目前為止，阿仔仍然未達標；比起正常既進度，大約仍差半年。只是由於阿仔完全明白別人同佢說話既意思，加上有哂反應，所以應該不用擔心的。治療師跟我們說，以阿仔既進度，再給多半年時間的話，應該沒有問題。如果半年後仍然維持比正常進度差距半年的話，到時才作轉介。

整個過程，我和太太都在旁觀看；阿仔已經識多左好多野，有d甚至仲係我地意料之外o忝。睇黎佢讀緊間幼稚園真係一個唔錯既選擇，安排佢讀全日制更加係一個明智既選擇！

之後，我地一家出左巿中心食飯慶祝，開心到震，最後各人都疲倦不堪，腳仔軟到震。

多謝各方好友既關心。

半年前，阿仔兩歲多，仍然只講單字，不達標；

為免有問題而遲發現，於是及早排期醫院檢查，

今日下午，醫院終於有空位，讓阿仔做檢查，見一見言語治療師。

…

其實，阿仔講說話既進度有一個轉捩點，就係剛過去的聖誕節長假期，

突然間，佢講多左幾倍既說話，好似開左金口一樣，

到而家去醫院檢查，都冇咁驚。

…

話雖如此，但願阿仔一齊正常，

講到底，都是病向淺中醫，

無謂自己呃自己，或者自己嚇自己。

阿仔呢期喜愛玩 LEGO，一日裡面可以玩十幾次，

玩完之後執好，執好之後唔夠一陣又倒出來玩過，

佢一倒出來，第一時間就大叫：「爸爸！坐！」

今朝佢一起身，就已經係咁大叫；阿仔呀，你爸爸我尋晚很夜訓呀。

同佢玩 LEGO，基本上都係我砌；細個未砌過，砌落又幾好玩喎，

不過經常比阿仔考起，砌馬馬同砌鹿鹿，咪差唔多，

砌完馬馬又話要砌鹿鹿，結果比左兩個一樣既作品比佢，

佢見到之後冇哂反應，喂，駛唔駛咁呀？真係有難度丫麻…

當中，都有幾個得意既傑作，係太太都話靚既，

例如獅子、大笨象、鱷魚、狗仔、烏龜，仲有比馬馬或鹿鹿條項長d 既長頸鹿，

同埋氹得阿仔最開心既「神舟六號」唔知係火箭定係太空船既作品，用 LEGO 駁成一條好長既火箭，雖然冇技術可言，但係就有聲有畫有動作；

「神舟六號！一、二、三，發射！」

火箭離開地面，升上一米後，脫落尾部；再升高半米，再脫落第二部份，剩返個頭做機艙，

在太空環繞一週，重返地球。

阿仔望住機艙，笑到架架聲。

聽到呢D笑聲，令父母無限滿足…

做野辛苦D，食少D又何妨呢！？

由於週日早上我和太太都要工作，

於是週六請來公公婆婆到來過夜，以便明早照顧阿仔。

為免阿仔起身唔見我地又唔知發生咩事，於是在臨睡前，

我和太太咁樣同阿仔講：「呈豐，明天早上我和媽咪都要返工，你要聽公公婆婆既說話，知道嗎？」

看著阿仔既表情，相信佢係完全聽得明白了；

佢可愛既臉容，由笑著轉至呆滯，再由呆滯轉至想哭，

唔單止咁，佢仲開始不停重覆咁講呢句說話：

「帶…埋……呈…豐。」呢句說話，講左超過十次。

我和太太對望，心酸到不得了，眼睛也不禁紅起來；

接著，我只好著阿仔乖乖睡覺：「你要乖乖瞇埋眼睛，不早點睡覺，要是明天起不到身，可不能怪我們喲。」只見他立時緊閉雙眼，努力入夢去了。

整個晚上，阿仔不時伸手過來，摸一摸，看看我是否仍在。

次日天未光，我和太太悄悄起來，將棉被蓋在沈頭之上；看見阿仔又伸手要摸，我音時急速地離去。

下午所有工作完畢，去到酒樓會合阿仔，只見他臉帶笑容，歡喜快樂，似乎甚麼也記不起了。

… 可憐天下父母心。