作者: waiwinglaiyee

今朝一早媽咪渣左車返工，但係阿仔駕手推車就係私家車裡面，

換言之冇得推車，阿仔又接近三十磅，抱唔得幾耐，

於是父子二人只有慢慢行返幼稚園。

未出屋苑，阿仔話要去百佳，唔返學，拖我要行某方向，

我唔理佢，仲同佢講：「丫，前面唔知有冇狗狗呢？」於是佢就跟住行。

出左屋苑，行左一陣，阿仔同我講：「冇狗狗喎。」我微微咀笑。

行下行下，過左紅綠燈，遇到一對公公婆婆，佢地問 “濕地公園" 點去，我就話比佢地聽點樣去，

阿仔聽到，又話要去濕地公園，唔返學，拖我返轉頭，

我又唔理佢，仲同佢講：「你自己去啦，你跟公公婆婆去啦。」婆婆遠遠笑著望住我地，阿仔結果又跟我繼續行。

又過左條馬路，我同阿仔發現路邊有好多小黃花，沿途仲有好幾隻蝴蝶，仲有麻雀仔，條路好好行。

原來有時唔推車，同阿仔慢慢行，雖然用多兩三倍時間，但所遇到或得到的，反而更開心。

人生有時實在太匆忙，錯過了身邊的一切美事。

謝謝媽咪，忘記了放底手推車，造就此次美好回憶。

 今日帶阿仔返學校，做完早操之後，

佢衝左入小朋友洗手間，罕有地喺呢個時候話要便便，

…

期間同佢唱下歌，數下動物，間中又叫佢出下力… hmm…

如此，我等左十五分鐘。

上星期有一日，嫲嫲湊阿仔，有一件趣事發生，

好似係阿仔掛住玩，唔肯訓晏覺，

於是嫲嫲同佢講：「你咁樣，話比你爸爸媽媽聽！」

阿仔竟然不甘示弱，還以顏色，回答：「我又話比爸爸媽媽聽！」

但其實佢已經倦到不得了，死撐不了，講完之後隨即便喊起來；

喊左一陣，喊下喊下就訓著左。

如果嫲嫲同阿仔一齊講野比我聽，到時我真係唔知聽邊個先啱咯，

為左要教好阿仔，我諗我會聽嫲嫲講多d，

不過罰唔罰，就要睇情形。

水痘過後，阿仔既皮膚有成六十至八十粒結左焦既小疤痕，

睇見都眼寃，前日佢同嫲嫲去濕地公園，仲比人趕o忝呀，真係慘！

其實醫生話休息五日便應該可以返學，但係濕地d人以為佢會傳染，

見到佢個碌，就已經走都走唔切；又難怪既，阿仔個碌咁剎食。

阿仔自己玩，又唔肯走，於是人地咪走囉；

好彩阿仔仲細個，唔知道d人驚左佢，如果唔係都幾心傷，咁細個就比人杯葛。

依家總算雨過天晴，不過今朝我帶佢返學，都特登遲d返，費事嚇親其他家長；

反而d同學仔見到阿仔，就開心到不得已，好似睇足球小將咁，入波之後個個走埋黎一樣，

仲好歡迎阿仔o忝，阿仔咁細個就有一班咁鬼好既同學仔，真係好！

諗下諗下，好在爸爸都有一班好同學，結婚既時候做我既兄弟，

睇番d結婚相，真係不枉此生！

開心又好，唔開心又好；健康又好，有病又好；順境又好，逆境都好，轉眼又已經廿年，

我希望在阿仔成長的日子裡，同樣能有一班好同學好朋友好兄弟，互相扶持同勉勵，

不論順逆，甘苦與共。

呢幾日最困難既，係離開屋企既時候，

由於阿仔出水痘，冇返學，所以一早起身就係要同爸爸玩，

試問玩左一大輪，又點會捨得比爸爸走丫！？

每一日，都要好決絕咁先至走得到，而佢就喊到好似鬼咁淒厲。

尋日我出門口既時候，唔知阿仔係咪放左幾日假開始悶，竟然話要返學，

一時佢就話：「返學」，一時就話：「一齊走」，真係令我眼淚在心裡流，

其實我都想阿仔快d返學，希望佢既生活規律d，

最好就梗係佢自己都鍾意返學啦！

 星期五幼稚園來電，話阿仔發燒，

於是立即請嫲嫲幫手接仔，

放工後，急急趕回家，一行人一同帶阿仔去睇醫生兼食飯，

經醫生確診，證實阿仔係生水豆，要休息一星期不能返學。

睇完醫生，食埋飯，我地係商場慢慢行，

我左手拖住嫲嫲，右手拖住阿仔，三人行，感覺很溫馨，又特別，

雖然我唔記得自己幾細個出水豆，但係嫲嫲可能會有d印象，

我相信將來阿仔自己都唔會記得依家出水豆既情況，但我估我可能會記得。

每朝早阿仔返學，出門口梗係要「垃」一兩件玩具在手，

每次佢攞多左幾件，我都會勒住佢，直接了當地話「一件！淨係比攞一件！」

雖然阿仔手渣住兩件，但係佢都會講下價：「五件！」

望住佢，都唔知好嬲定好笑，究竟佢係想講兩件定係五件呀！？

有時如果佢渣住兩件細既玩具，我都會算數，

不過今次佢抱住兩駕大車話要帶返學，我梗係唔可以妥協啦，

強搶是無用的，只會帶來哀號，

於是為左要佢乖乖就範，我就同佢講：「帶兩件，冇糖食！」

都唔知係咪佢學校聽得多，我都未講到個食字，佢就已經遞左其中一個玩具比我，

然後話要「食糖糖！」

信守承諾，我就比左一粒魚肝丸糖比佢食，

跟著，我們一齊開開心心咁返學，

阿仔含住粒糖，去到學校都仲未食完。

尋日早走，去接阿仔放學，又遊了一轉綠田園，

今次由於係平日，一個客都冇，只見兩個工作人員，

我地又走去睇牛睇羊，發現果三隻黑山羊比人困住左，仲上埋鎖，

隻牛就唔知去左邊，又唔見哂d賣草既阿婆，人影都唔多個，

探完羊羊之後，已是黃昏，我地便慢慢行離開，

阿仔不斷咁問：「牛牛呢？」

我地答佢：「牛牛放假呀，去左街食草。」

去到大門口，見到個大叔，我地問佢：「牛牛呢？唔見左既？」

佢舉手指住某個方向，答我地：「牛牛去左果邊食草，我地係假期先至困住佢，平時由牠四圍走。」

聽罷，阿仔好似明明地，好期望假期既來臨，到時可以再見牛牛。

雖然係咁，走既時候，依然係喊到死。

阿仔，星期六我地再黎探牛牛啦。

星期六朝早，同媽咪阿仔去元朗食完早餐，然後去左天水圍綠田園，

果度有船仔，有燒烤，有中藥園，又有動物睇，最好既係唔駛入場費，得閒就可以去，

其中，我地向個阿婆買左兩蚊既草，去餵動物，果度有一隻牛，三隻黑山羊，

我渣住阿仔隻小手，再渣住一注草，然後餵山羊，

d羊淨係食葉，唔食框，佢咬住一扯，嚇到阿仔幾乎喊，

好在有爸爸係度，有好大既安全感，最後先至勒住唔喊，

餵完山羊我地又餵牛，阿仔全程係咁叫「大牛！大牛！」

媽咪就拿住個相機，捕捉珍貴既片段，

後來，阿仔同佢地講拜拜，「拜拜牛牛，拜拜羊羊！」

不過返上車，梗係唔肯走喇，喊到死咁制。

之後星期日同星期一，日日都話要去睇牛牛，睇羊咩咩。

今朝又話唔返學，要去睇羊咩咩，

梗係唔得喇！

媽咪話阿仔每晚都要同爸爸鬧交先安落。

今朝阿仔食完早餐之後，我諗住幫佢換校服返學，

佢竟然話：「唔要爸爸！要媽咪！」

我心裡一沉，問他：「你唔要爸爸，咁你要唔要糖糖丫！」

佢梗係話「要糖糖啦！」

我再問佢：「你係咪真係唔要爸爸呀！剩係要媽咪呀！？」

佢回答：「要爸爸！」

到出門口既時候，我拿了一粒朱古力給他，兇佢：「唔要爸爸丫嗱！剩係要媽咪？」

佢笑笑口，大大聲咁講：「要爸爸！！要媽咪！！」

我突一突，呢個仔，唔簡單，

轉數好高，似足爸爸，

不過爸爸唔多食糖，

如果唔比佢激死既話，見到佢都夠哂甜。