話說屋企有一部DVD機，同另一部由VCD同錄影帶組合而成既機 (唔知佢叫VCD機好定係錄影機好)，
近兩星期果部組合機開始認唔到碟，於是阿仔果D小朋友影碟通通睇唔到，
而且由於部DVD機剩係睇到DVD，甚麼CD、VCD又係通通認唔到，
結果阿仔就日日冇得睇，餓左碟個幾禮拜。
感謝朗奴叔叔慷慨解囊，贈送一部好耐冇用又唔知用唔用得既VCD機，
結果攞左番黎搏一搏，又駁一駁，結果就真係駁到之餘又搏到，
爸爸一路駁，阿仔就一路坐在地上好鬼支持咁，
終於為困局解悶，佢果幾十隻碟終於重見天日，開心到不得了，
餓左咁耐碟，佢即刻要做既野就梗係煲碟啦！
由三點半起，立時煲左《荒失失奇兵》、《恐龍仔班尼之動物園》同埋《反斗車王》，
成功播碟，阿仔自己搞掂，爸爸第一時間，梗係走入房午睡啦！
可以甩身小睡片刻，一字記之曰：「正」！
星期六，阿仔嘔左兩次，疴左四次；
星期日經醫生確診為腸胃炎。
今朝勸佢食藥，勸了半小時，最後我換衫著襪，大到佢盡先至成功。
一食完藥，我叫佢勁飲水，之後佢話要食糖糖，我梗係唔比得喇！
我懷疑佢扭拎咁耐，又喊又剩，可能係想同我講數，無非係要有糖先肯食藥；
但係作為英明既爸爸，我係有責任教好佢既，唔可以下下講條件嘛！
妨且面對肚肚唔舒服既阿仔，我係唔會讓步既，最終都能成功餵藥。
不過當佢喊住話d藥「辣辣」時，我就真係試過小小佢d藥，其實真係好難食。
咁喇，等阿仔好番，我一定請佢食糖糖，到時我又試小小佢d糖，實行同佢一齊食，分甘同味喇。
又是返學的早上。
今次阿仔放棄了電單車，手執住足球，指住樓下：「爸爸，踢波波丫！」
我答佢：「好丫，我地一路返學，一路踢波波丫。」
落到樓下，佢唔肯行原本返學既路綫，行左去球場那邊。
我同佢踢左兩腳，話要踢去返學果邊；佢嬲罷罷，將個足球細細力踢去球場果邊，
於是我收波，唔理佢，佢扁起臉，知道上當了，比爸爸騙了返學。
…
由於帶足球既緣故，今次冇手推車，又冇電單車；
以為一路踢住個波，阿仔就會跟住跑，
誰知行不到兩分鐘，阿仔竟然扭住要抱，
OH NO! 幣家火，今次輪到我上當了，佢攔住條路，無辦法，我既父愛又出來，焗抱！
…
行行復行行，行左一陣，見到前面有個媽咪拖住個小妹妹，
靈機一觸，「嘻！阿仔自己行，快d追前面既小妹妹！」
於是阿仔乖乖就範，一落地就快跑追妹妹，嘻嘻，又論到佢上我當！
追下追下，就差唔多追到學校附近，搞掂！
鬥智鬥力… 下次一定唔可以剩係帶足球，重死我。
美國槍擊案果名韓藉友仔係叫咁既名o架，
如果我將弟弟個名改為趙呈曦，係咪會唔係幾好呢？
有陰影啊…
今朝早阿仔返學出門口，佢話要坐電單車返學，
我同佢講：「我地冇電單車，唔坐電單車返學，坐手推車喇！爸爸推你返學。」
點知佢話：「唔坐手推車，坐電單車。」
o係我仲疑惑緊既時候，佢走左去攞架單車出黎，
指住呢駕三輪車，佢話：「爸爸，坐電單車返學，好唔好呀？」
望住佢咁可愛既樣，我就應承佢；
如是者，佢就坐住呢駕電單車，其實係腳動再加爸爸後面推動既三輪車，
阿仔駕左左十五分鐘，終於返到學校。
…
阿仔大個唔好駕電單車呀，好危險o架！
(係果D唔怕危險既叔叔先會駕電單車架，佢唔會撞親但係就有機會壓親咁囉。)
媽媽提出了四個她接納的弟弟的名字，分別如下：
趙呈添 – 呈獻不斷加添
趙呈曦 – 呈獻晨曦 (一日之始)
趙呈越 – 呈獻不斷超越、蒙悅納
趙呈延 – 呈獻延續
我就覺得"呈添"幾好，不過o涼o涼地；"呈曦"都唔錯，但係就筆劃太多。
另外，我覺得其實呈天、呈朗都可以。
暫時都係呈豐最好聽，呈尖就咪搞咯。
要繼續諗下，畢竟名字係父母對子女既心意。
爸爸：「阿仔，弟弟叫咩野名好呀？趙呈咩野呀？」
阿仔：「趙呈…Tim !!!」
爸爸：「咩野話？趙呈咩野話？」
阿仔：「趙呈…Tim !!!」
爸爸：「吓？趙呈咩野話？趙呈尖？」
阿仔：「唔係呀，趙呈…Tim !!!」
爸爸：「吓？講清楚D？趙呈尖？」
阿仔：「唔係呀，趙呈…Tim !!!」
轉眼又過左幾日，阿仔既脾氣越來越大，
佢已經演變到，一有D唔開心或者唔鍾意，又或者我地鬧佢，
佢就會同番我地講：「你yai yai，你返工呀！」
有時都係比佢激到唔知好嬲定好笑，
就會同佢講：「你先至yai yai，你返學呀！」
佢又會自己嬲，嬲完又自己笑。
媽咪每朝早喺阿仔起身之前就已經出左門口返工，
阿仔起身之後，第一句就問：「媽咪呢？」
於是我就答佢：「媽咪返左工。」
…
每逢星期六、日，中午婆婆都來幫助媽咪，然後我就出門口，
呢個時候阿仔十居其九都會喊，
於是婆婆對阿仔講：「爸爸返工，買奶奶呀！」
我就同阿仔講：「爸爸返工，你留喺屋企喇！」
…
在復活節假期裡，有一日，爸爸、媽咪話同阿仔去街街，
阿仔著好哂衫之後，跟住同佢晚晚攬住訓覺覺果隻公仔，
好頂癮咁講：「呈豐返工啦，你留喺屋企啦，我好快就返啦！」
我同媽咪對望，笑住出門口，呢幾日諗起都微微咀笑。
阿仔現階段有一個特牲，都幾有趣：
一朝早，喺屋企既時候，阿仔會搵野玩，話「唔返學」；
到放學果陣，佢喺學校一係就食緊野，一係就玩緊，佢會話「唔返屋企」。
只有食物能夠叫佢乖乖就範。
網站標題 