作者: waiwinglaiyee

弟弟身體健康，進展良好。

每次肚餓要飲奶，弟弟都變身大聲公，大哭大叫。

我發覺，佢原來已經發到兩個音，應該係佢識叫既第一同第二個字。

第一個識既字，肯定唔係叫「爸」或者「媽」 (發夢冇咁早)，

喺喊既時候，佢會叫「鴉~ 唔鴉~ 鴉~ 唔鴉~~  鴉~~唔鴉~~」；

每次我都整鬼佢：阿仔呀，你係想話「鴉」丫，定係想話「唔鴉」呀！？

呀仔梗係唔理我喇，係咁一直「鴉」同埋「唔鴉」，

直到有支奶塞入佢個口，就即刻鴉都唔鴉o勒！

阿仔呢期唔知係邊度學番呢，成日講一個字。

朝早出門口見到一個清潔姨姨，冇啦啦就講：「吓！？」

坐車返學，沿途見到巴士的士，我聊佢傾計，

「喂喂，呢駕咩野車呀？係巴士黎架！」

佢既回覆係：「吓！？」

佢成日冇喇喇就「吓」一嘢，真係呆哂。

媽咪坐月，阿大仔呢期慘咯，

朝早由爸爸送番學，媽咪唔出門口，梗係扭計啦；

傍晚由爸爸接放學，阿仔成為最後一個被接走既小朋友。

有一次，爸爸坐的士趕接放學，

到達時，外藉老師抱著阿仔企喺學校門口等，

阿仔兩行眼淚再加d鼻涕互相輝映，

睇到心都酸埋。

 http://video.xanga.com/xangaembedplayer2.swf?i=347105&m=aa64a&xt=1

等爸爸翻譯一下哥哥既歌詞先，大概係：A-Z, now I know my abc, next time want u sing with me.

BB回家了，母子平安！多謝大家既支持同掛念！

早幾日，作爸爸的我重新安裝了BB床，清理妥當，留給新生的弟弟；

誰知，呈豐乘弟弟在醫院未回家，夜晚突然同我講：「我想訓BB床。」

由於弟弟未出院，於是就讓呈豐瞓左兩晚BB床。

但係第三日弟弟出院，問題就黎嘞，

就係呈豐夜晚要瞓BB床，佢要同弟弟一齊瞓喺一張好細既BB床果度，

弟弟咁單薄，梗係唔得啦，容乜易呈豐半夜一腳就送走剛出世既弟弟架！

幾經辛苦，終於游說到呈豐瞓返大床，夾喺爸爸媽媽中間，

但我發覺佢已經有D唔開心，但由於佢勁錫弟弟既緣故，所以才肯讓步。

…

幼稚園既校長話，有D做哥哥姐姐既會妒忌弟弟妹妹，有D仲會靜雞雞打佢地o忝，

希望呢種情況，唔會發生喺呈豐同弟弟身上，

不過，相信BB床只係第一單引發衝突既事件，應該都錄續有來。

http://video.xanga.com/xangaembedplayer2.swf?i=338896&m=2a038&xt=1

弟弟隨時會來到，可能是這一兩天的事。

噢，早了幾日。

前晚孕媽媽感冒，發微燒，

延至昨夜凌晨阿仔被感染，發高燒，

希望等阿仔好返，最好就連媽咪都好埋，然後我先病倒；

唔病當然就至好喇！

阿仔終於明白到卡通片既內容，而且佢既感情好豐富，

上星期睇《木偶奇遇記》，講述小木偶要尋找爸爸，阿仔睇到喊。

尋日又睇《海底奇兵》，呢套戲大大話話睇左五十次以上，

睇到最後，Mo仔同爸爸重遇，阿仔又感動到流眼淚。

我心裡知道，阿仔其實好錫爸爸，當然爸爸都好錫阿仔。

話說前個周六(28/4)起，阿仔又疴又嘔，揭開腸胃炎既序幕抗戰近十日，終於戰勝病魔；呢兩日胃口大開，可喜可賀！

阿仔捱左十日，其實真係唔容易，瘦左三磅，係體重既十分之一。期間最慘既，肯定就係嘔到人都慌哂，因為喺頭四晚，晚晚都嘔一劑，有一晚仲係半夜四點，訓著覺黎嘔，攪到一床都係。

之後，由於怕怕既緣故，無論係食藥或食粥，佢都會喊住叫：「唔好呀，嘔呀！」

後來怕佢太驚，又見佢病，除左氹佢食野之外，都唔敢再逼佢做d咩。

點知，程況越來越嚴重，佢遇到所有唔鍾意既野，都會聯想到嘔；

「食藥喇！」「唔食呀，嘔呀！」

「食粥丫！」「唔食呀，嘔呀！」

「天氣乾燥，要搽Cream Cream呀！」「唔搽呀，嘔呀！」

聽到呢句，我地頂佢唔順：「嘔你個頭呀，乜都嘔？搽Cream Cream都嘔？」

後來，論到佢想食某d野，或玩某d玩具，就調番轉頭，

「爸爸，我想食蘋果呀！」「唔食呀，嘔呀！」(醫生話未好番唔食得。)

「爸爸，我想食糖糖呀！」「唔食呀，嘔呀！」

到e家，佢話會嘔既野，結果梗係冇嘔到喇！我地亦幫佢舒緩一下，話比佢聽原來只有唔舒服先至會嘔，平時就冇事。