話說某日係太太生日，一家大細夜晚去左某姨丈村屋屋企燒野食。
細仔訓到隻豬仔咁，大仔就四圍走來走去，同一眾表哥玩耍。
在燒野食的期間，阿仔既對答笑爆全場。
話說眾姨丈同舅父佢地飲啤酒汽水，阿仔又走埋去要飲要食，
走到去某姨丈身邊，指住佢果罐啤酒話想飲，又唔該又剩，
某姨丈梗係唔會比小朋友飲啦，於是就同佢講：「冇你份呀！」
阿仔不明所以，繼續追問：「吓？冇奶粉？」
一句冇奶粉，笑到大家反哂肚，
某姨丈差d噴埋啤酒出來。
其實阿仔已經飲少左好多奶，唔通佢掛住要飲奶？
網誌
Here I am!
禮拜日去葛福臨祈禱會，打左成百個乞嗤，咁就病左，
一直要撐到星期一晚做完安息禮拜既主禮，星期二早上出殯之後，
下午才能夠早退去睇醫生，跟住大昏迷瞓返一覺。
結果星期三朝早送阿仔返學遲左少少，外藉老師Jenny係度點緊名，
突然聽到有一個女仔好流利咁講：Here-I-am.
真係嚇左一跳，
不期然，心裡面諗：「唔知阿仔識唔識答老師呢？唔會對外藉老師講個『到』字咁on車車啩!？」
於是留左喺班房扮幫阿仔執書包，等老師繼續點名。
一直等，當老師叫阿仔個名既時候，期待既一刻，真係好緊張下，
阿仔大聲答：「Here-I-am！」
結果，老師比左句Excellent佢，
我內心就比埋句Perfect佢忝！
成個心定哂，跟住咪咪笑慢慢離開課室。
車！原來佢地日日都係咁講，跟本就係全班小朋友都識，
大包
阿仔唔舒服，今早指著個大包話要食，我唔比，要佢食粥。
於是佢大聲對我說：「你走啊！」
我就耍佢：「下，你竟然為左個包，叫~我~走！？」
阿仔默然不語。
…之後玩到佢殘。
嘩！好痛！
呢期大仔晚晚睇鹹蛋超人迪加，
之後臨瞓前就例牌o係大床度跳同叫，
怪獸呢個角色永遠都係我去飾演，
好彩超人都仲係錫住怪獸冇認真打落黎。
但誓都估唔到既係，得四個半月既細仔，
為左訓練手眼協調，尋晚佢隻手仔捉實一個曉響既啷啷，
竟然係咁「鏘」我個膝頭；嘩，真係好痛！
媽咪仲話：「弟弟，快d長大，同哥哥一齊夾攻爸爸！」
我都期望弟弟快d長大，但係唔係好敢想太多。
我諗我比佢地兩兄弟打傻左，而家係度一邊打字一邊笑，
果然，一切都是恩典，
人不能自救。
感謝神！
中秋節
短宣回來至今終於補到一日假，係中秋節正日。
下午三時，我帶呈禧去健康院打針，
嫲嫲一齊去，問我：「做咩揀今日打針？」
我答：「有咩野問題？」
嫲嫲笑說：「過節嘛。真係慘！BB第一次過中秋，就要打針。」
我笑答：「咁先應節丫麻！」
不過打釘唔係打响八月十五果度，而係打大脾。
BB喊左兩聲，未出打針間房就已經冇喊，好堅強！
佢一定唔會記得呢次中秋節，但嫲嫲就會記得，
我都實會記住，快樂的打針日子，呈禧第一次過中秋。
呈禧新照片
幫爸爸著襪
今朝送仔返學之前，
正當著襪之際，
阿仔無啦啦走埋黎，說：「我幫你著丫。」
跟住我就交左隻襪比佢，說：「好丫，唔該哂。」
佢左拉右扯，成功將我的四隻腳趾套入襪內，
攪左半分鐘，正式宣布：「唔得呀。」
望著佢幫我著襪既過程，內心暖烘烘，
為免佢失望，我立時便捉住佢隻小手，
一套一扯，就將隻襪著好左，
然後同佢講：「唔係丫，咪著左囉；叻仔，唔該哂！」
阿仔見隻襪成功著左，好開心，笑住出門口。
見到阿仔開心，我又開心埋一份。
…
阿仔，你學識自己著襪先啦；
到爸爸第日自己著唔到襪，到時唔知你會唔會幫我呢。
駕車
今早阿仔媽咪番工番十一點，當我地一齊帶阿仔返學既時候，
我問媽咪：「你今日駕唔駕車返工呀？」
媽咪答道：「我唔駕咯，今晚要返學。」
然後，阿仔問我：「爸爸，咁你今日駕唔駕車返工呀？」
我回答說：「我唔駕咯，送完你番學就渣番駕車返屋企先。」
跟住，他竟然好認真咁問：「咁我駕唔駕車呀？」
我地呆一呆，媽咪望著佢，說：「你都唔好駕咯，危險啊 (D途人)。」
…
上左私家車之後，阿仔問媽咪：「媽咪，你在那裏返學？」
媽咪竟然好認真咁答：「在葵興。」
阿仔：「我駕車送你返學丫。」
媽咪微微笑：「好丫，不過你要同爸爸一齊來喎！」
我鄒一鄒眉，又好認真咁答佢地：「唔好喇！好~好~好遠架！阿仔你都係唔好駕咯。」
結果阿仔再冇講野，媽咪就啤住我。
我就繼續駕車，一齊送阿仔返學校。
老虎與豹
睇左好多好多日載有動物圖畫既書，
教左阿仔幾次老虎同豹既分別，終於有成績，
阿仔尋晚識得話比我聽，老虎與豹既分別，超勁！
我指住隻豹，問佢：「呢隻係咪老虎呀？」
佢話：「唔係！呢隻係豹！」
然後，我指住隻老虎，問佢：「呢隻係咪豹呀？」
佢又話：「唔係！呢隻係老虎！」
我再問：「老虎同豹有咩野分別呀？」
佢呆左唔識答我，我就幫一幫佢：「豹的身上係咩野圖案呀，係一點點定係一條條呀？」
佢即刻就答我：「一點點。」
我讚佢：「叻仔，咁老虎呢？」
佢又答：「老虎係一條條。」
突然間，我覺得阿仔大過仔左好多，觀察力都幾強；
而且，有一次我見佢著拖鞋，佢原來已經開始分到左右，雖然唔係次次都啱。
唔知會唔會係資優兒童呢？
叫咩名？
媽咪問阿仔：「你知唔知爸爸叫咩名。」
「知，叫趙偉榮 ！」
「你自己叫咩野名？」
「叫趙呈豐！」
「弟弟又叫咩野名？」
「叫趙呈禧！」
「媽咪又叫咩野名？」
「……………..叫麗儀！」
大家都哈哈笑。
網站標題 