今年既聖誕禮物, 絕對係令人失望甚至憤怒！
牛肉乾… 又係你!? …仲係兩張打孖黎!? 成年都唔黎係等聖誕先黎…
香港政府….真係高效率…
真係想講番d生果名…蘋果香蕉橙士多啤梨…
阿仔仲慘, 報佳音後返到教會，
跑步跌倒個頭撞落個門鎖之類既位…然後大喊..
今次真係眼睜睜睇住佢個樓一分一分咁脹起，附近d血管定係青根又現埋,
我諗冇一cm高都有7-8mm高，好恐佈，嚇死我，
但係唔想嚇親佢，只能夠响個心到震，
好在教會有兩個護士長响度，但係都真係怕怕。
阿仔呀，爸爸賣左層樓，冇諗住咁快就再買樓架，
你唔好自把自為喇，潛建犯法架！
今朝打了兩次大仔，
第一次打了一下手仔，第二次打了大腿三下，
… 又嬲又後悔，好矛盾，
打在兒身，
痛在父心。
打仔，可免則免，暴力是解決唔到問題的。
早上，送小朋友返學的，十居其七八是女性，不是外僱便是母親，
剩下十之二三大部份為公公、爺爺，甚少是爸爸的，
阿仔有幸幾乎每一日都是由爸爸送返學校，同佢一樣，這也是我值得自豪既地方。
男女有別，在送仔返學之後，一般都甚少與其他女性家長打交道，
最多都係打聲招呼講聲早晨，
一來以免自己好似成為師奶既一份子，二來唔想講學校既是非，三來驚講起教仔經唔識應對。
今日沿路送仔沿路走，見到馬太，佢竟然停步等埋我，
我就好有禮貌同佢講聲早晨。(其實响學校已經講過)
佢問我：「你個仔返到屋企識唔識得讀學校派果d英文書架？」
我未瞓醒，拖延時間：「…. 邊d呀？」
馬太追問：「呢，果d一本本細既英文書仔呢？」
我開始有少少印象，回佢一句：「… 係教科書，定係果d每週借番黎果d呀？有兩種喎。」
馬太好清楚咁問：「唔係借返來果d，有印學生名架，應該係教科書，細細本果d呢！」
我真係比佢問到冇哂貨喺手，唔識答佢。心諗：「呢排夜晚冇同阿仔溫書喎。」
於是我斬釘截鐵，笑住答佢：「哎呀，我唔知喎，我淨係負責同佢玩咋喎。」
馬太笑稱：「吓，淨係玩？」
我無言以對，心裡其實諗：「唔得咩？」
然後，我只能微微笑，答：「K1咋喎，唔駛咁緊張既。等今晚我試下佢識唔識，第日再答你啦。」真係一額汗。
離開之後，好多野諗：「唔知阿仔識唔識呢？追唔追得上呢？會唔會係其他小朋友都識，但係得佢唔識呢？」
突然，想起老師曾在十二月初家長日話比我地聽，阿仔每次認字都識哂，係一個聰明仔。
當堂定哂，千祈唔好自己嚇自己。
我要清楚知道自己既崗位，就係陪住阿仔成長，讓佢有一個開心既童年，鼓勵同埋肯定佢。
仔照玩，溫書留返比媽咪，
其實真係 K1啫，唔駛咁早挫書；只要培養閱讀既習慣咪得囉，又唔係唔識。
呢期細仔次次沖涼都手舞足蹈，認真棧鬼。
同大仔一樣，佢沖涼係响一個沖涼盤裡面的，
個比例就好似大人浸响浴缸一樣，而且同浴缸一樣有一個去水位。
早兩日，話說又幫細仔沖涼，
佢經常都手撐腳撐，有時捉住個網，有時捉住個盤，有時又會扯住我d手臂、衫或者係頭髮，
點知佢今次大力一扯，扯走左去水位果個塞，
水向低流，既急且快，我响佢隻手搶得番個塞再塞住既時候，已經半個客廳水浸，
弄得狼狽不堪，雞手鴨腳。
印象中，呢次都係第一次，幫大仔沖涼從來都未試過。
應該唔駛買保險防水啩！
本周從報章和媒體又看到一則駭人的新聞，一名十四歲少女在家產子，將一名尚連臍帶的初生嬰孩擲落街，無助的嬰兒身體多處骨折死亡。多日來心情沉重，常常念記著家中的兩個孩子。
每天早上，送大兒子回學校後，輒返替小兒子洗澡才回教會作工，等到太陽下山後再回家替大兒子洗澡；這些「親子時間」讓我知道，兒童有很大的需要，以及嬰兒是多麼的柔弱。
嬰兒不懂坐、不懂走、不懂說話只懂哭，顯示著完全的無能和倚靠，人怎樣對待他，他也無法反抗，生命的控制權完全不在自己的手中。
聖誕節，就是記念著約二千年前，全能的上帝竟然成為完全無能的嬰孩，在馬糟中誕生。距離慶祝這個基督誕生的節日，佳音隨處可聽的日子，還有數天。
我們相信道成肉身，全能者成為無能者，祂倒空自己，不以絕對的權勢權力掌管操控世界，卻甘願捨棄尊貴的身份和地位，以祂的大愛和犧牲施行救贖。
從此，世間不再一樣，金錢和權力不能操控一切，惟主的愛能挽回人的心，讓黑暗遇上光明，陰霾得以消散。只願在基督降生的紀念日子裡，不是罪惡的氾濫，而是更多人能夠得享主愛，聽聞福音，重生得救。
及後，我得悉這位十四歲母親就讀於一所基督教中學，是以，我既祈且盼，希望這無助嬰孩的無助母親及其家庭，能早日聽聞福音，經歷主赦罪的慈愛和憐憫。並且，願主差遣祂的教會和門徒，關懷鄰舍，守望相助。自此，悲劇不再。
今早收到一個短訊，內容大致如下：
Our baby girl was born this morning. Baby and wife are fine. We thank for your care and look forward to seeing you…
在此衷心祝福他們一家，祝願BB女健康活潑，開心勁快樂！
我語盡心長地提佢：「喂喂，瞓得好瞓咯！佢地一出院，你就冇覺好瞓！」
他笑著回答：「收到喇！所有為人父親的，都給予我這個提醒。」
… 天下父親都是傻的，笑著迎接冇覺好瞓的日子。
「… 遲d你就知味道！」(我心裡這樣想。)
其實… 我都是傻的，仲傻左兩次。
半歲既細仔梅開二度,
連續兩日在沖涼盤裡面… 斟茶！
茶既不多… 涼照沖可也…
環保嘛！
阿仔近日頻頻背詩和唱歌，既好聽，又好笑：
氹氹轉，「都」花園，
炒米餅，糯米糍，
我媽媽，睇龍船，
我唔睇，睇雞仔，
雞仔大，捉去賣，
賣得幾多錢？
十「炆」！
細仔半歲大，真係超趣緻。
佢用成隻小手捉住我一隻手指，捉得好實。
同佢玩Hide and Seek, 佢笑到騎騎聲，
含住奶咀，含一陣間就跌出黎, 跌左就喊, 塞番落佢個小嘴就收聲，
我試過响佢身邊咁住個奶咀, 同佢一齊睡著, 難度好高,
呢d回憶都幾sweet…
近日放大假, 日日送大仔返學, 又接放學,
拖住佢隻小手，發覺佢隻手大左好多,
由起初佢用隻小手捉住我一隻手指，
慢慢學翻身, 學坐, 學企, 又扶住疏化學行, 到而家已經學識跑步,
我隻手拖住佢成隻小手，每日放學後去屋企樓下遊樂場玩，
真係感受良多，
再遲d, 佢隻手會大過我隻手。
神的創造真的很奇妙…
人生過了三十年，又從兒子身上看見自己的成長,
一步一步成長，循環不息。
原來生命不在乎家道豐盛，乃在乎是否看見上帝的恩典和帶領，
確實，至此… 內心…感恩不盡。
呢期阿仔最愛既，係矇面超人。
每一天，他除了認字讀書之外，總會看一隻矇面超人既VCD，
晚上就會同爸爸玩超人大戰大怪獸既睡前遊戲，真係晚晚歡樂今宵。
有一日，阿仔發現屋企多左一個矇面超人，發現原來係媽咪，
媽咪由於做臉膜，將一塊白色既物料貼左响塊臉度，淨返眼耳口同埋鼻孔。
殊不知阿仔大叫「超人啊」之後，再望多兩望，
發現勢色唔對，即時一支箭咁衝左入房，指住媽咪，改為大叫：「有怪獸啊！」
唔單止咁，佢仲驚到喊，開頭以為佢玩媽咪，點知佢越喊越大聲，眼水鼻涕都有，
於是乎正義既爸爸就走出來嘞！
阿仔已經响間主人房果度，長長走廊的另一端，他只看到爸爸，看不到坐在梳化的媽咪，
咁我就做左一場自編自導自演既戲，扮做超人不斷打怪獸，
阿仔看到又喊又笑，呢場戲足足維持左成十零分鐘，媽咪先做完臉膜，
最後爸爸終於趕走怪獸，幫阿仔救番媽咪。
在臉膜之中，一直都睇唔到媽咪有任何表情，只係眼超超睥到實一實。
網站標題 