網誌

玩三次

由waiwinglaiyee撰寫

基本上，每晚都會同阿仔玩「撻撻撻」，

這是一個包含柔道、超人大戰怪獸、同埋騎牛牛既大包圍遊戲，

即係喺大床上係咁撻，又吱佢笑到要求救為止，之餘此類…

有一晚，阿仔其實都幾攰，我就同佢講：「玩三次撻撻撻，然後瞓覺，好唔好？」

阿仔回答：「唔好！」

我又問：「咁玩幾多次先訓覺呀？」

阿仔答道：「1, 2, 3, 4, 5, 7, 8, 11, 12, 13,14,151718….咁多次。」

我扮唔明：「咁即係玩幾多次呀？」

阿仔好清楚地回答：「三次！」

我忍住笑：「好！成交！我地玩三次就訓覺！」

 

流鼻血

由waiwinglaiyee撰寫

嘩！阿仔尋晚睡覺，無喇喇話有鼻水，

我幫佢一抹，點解咁深色既？發現現來流鼻血！

搞左幾個字，流左都幾多，連床單都有。

幾乎嚇親阿仔。

 

特寫鏡頭

由waiwinglaiyee撰寫

近日有幾個阿大仔既特寫鏡頭，繞繫於腦海中：

1. 在浸會大學會堂聯合崇拜中，進場時看到阿仔坐在旁邊，他叫我坐在他身邊，但我需要坐在前頭，只能微笑一下便繼續向前行了。

2. 散場後，教牧要留步影兩張相。站在台上，看見台下的人已人潮散去，朝向阿仔坐的位置看，竟然看見太太和阿仔仍然留守最後，更向在台上的我猛然揮手，我也隨即大大揮手，大家看見對方，仿如隔世，非常開心。阿仔等左兩個幾鐘，之後成個下午跟住我跟到實一實。

3. 去到又一城，食完M記之後，阿仔在冰場旁邊眼定定咁望住d人溜冰，看到人地飄飄下，又看到有d人跌低，阿仔心大心仔想溜冰。無奈爸爸一身恤衫西褲兼中褸，惟有安慰佢：「阿仔，你要四歲先學得溜冰喎。等你一到四歲，爸爸就同你溜冰啦。」

4. 尋晚返到屋企，弟弟都有驚喜，佢第一隻牙仔就黎出來喇！

 

 

小童玩伴

由waiwinglaiyee撰寫

話說兩三年前阿姑媽送了一個HIPPO 公仔比大仔，

在大仔一歲開始，個公仔就已經晚晚陪住佢睡覺；

最初佢矮過隻公仔一截，後來同隻公仔一樣咁高咁大，

到現在長大了，高過隻公仔好多好多，

以前阿仔攬實佢睡覺，但現在隻腳已經再夾唔到隻公仔，

惟有當佢係枕頭。

其實我真係好多謝呢隻HIPPO，佢係阿仔既好朋友。

隻公仔已經洗過好多次，有d殘殘地既感覺，

希望唔好咁快爛，爛左都唔知點算。

間公司已經結業，買唔番。

 

完功

由waiwinglaiyee撰寫

尋晚又陪阿仔訓覺，又真係訓著左，

萬幸老婆尋晚返夜學，返到黎叫醒我起身，

溫溫櫈櫈未訓醒之餘，竟然發左神經，

最終响半夜三點趕起份功課，仲幾乎爆字。

不過其實已經遲左好多，真係覺得唔好意思。

真係要慶祝一下，要狂讀聖經、煲碟、同埋安心訓覺…

多謝大家既禱告同支持。

 

想睡覺

由waiwinglaiyee撰寫

阿仔每晚都同我講呢句說話：

「爸爸，你今晚同唔同我睡覺呀？」

其實晚晚都係三個人一齊睡的，但我又會同佢講：

「唔咯，爸爸今晚要做功課，你自己睡先喇。」

佢例牌既回覆：「哎，我好想同你睡覺啊！」

由於佢碘床碘成大半個鐘都未能入睡，而呢大半個鐘之中會不斷大聲叫「爸爸」，

加上疲倦，我就會心軟下來，就陪左佢睡覺。

結果份功課拖下一日，拖下又一日，到而家都未交到。

唉… 都係自己定力唔夠，人又懶。

唔想做功課就好咯。

大細仔

由waiwinglaiyee撰寫

以下是一些對過去一年的回顧：

1. 太太誕下細仔，竟然同大仔同一日舊曆生日，日後可以一次過同佢地慶祝，唔會大細超，又慳番唔少。

2. 大仔勁似爸爸，細仔則超勁似媽咪，比我地細個既相工人睇，工人仲以為係幫大仔同細仔影既相。

3. 大仔bb既時候不斷拎頭，細仔而家不斷點頭，佢兩兄弟好趣緻，個性迴然不同。

4. 大仔小時說話詞彙數量不合格，細仔則是聽覺不達標，你唔講，我又唔聽。

5. 大仔出世滿月後搬了一次屋，到細仔出世後不久，又搬了第二次屋，搬屋同生仔應該冇關係啩。

雖然大仔細仔咁唔同，但都係我既寶貝。

一諗到佢地日後一齊扮超人聯手，合作對付大怪獸爸爸既時候，真係勁過風雲聯手唔講得笑，媽咪一定係坐埋一邊觀戰同埋心涼地奸笑，呢d情境，真係諗起都驚。

雖然驚，但仍然十分期待。

 

最小的試探

由waiwinglaiyee撰寫

試探係受著環境既影響，面對著被逼或自願或不願地做出某些原本唔想做既事情既掙扎…

有些試探是一定要勝過的，例如：

當你好尿急既時候，要去厠所，

突然間阿仔又話要去屙尿，

你就要首先帶佢去厠所，

幫佢小解，陪佢小解，望住小鳥流水，聽著流水孱孱，

隨著視覺和聽覺既環迴立體效果…，

呢個時候你要運勁作出抵抗，否則後果堪虞…

…

有些試探是一定要勝過的，試探操練和提升你的忍耐力。

信者得救。