星期二在一間中學帶小組，言說間我問學生們一個問題：
「我有兩個仔，一個四歲多，一個一歲多；當他們爭玩具時，你們估吓邊個會爭贏？」
有些學生說大仔爭贏，有些則說細仔必勝，
我補充：「四歲的大仔識走識講，為甚麼會輸給一個不懂走不懂說的呢？」
大家都回答說：「因為哥哥讓弟弟。」
的確，哥哥很錫弟弟，大部份時間爭兩下便會讓給弟弟，
小部份時間，係作為爸爸的我，跟媽咪一起勸勸哥哥學習讓弟弟，
或是陪哥哥玩其他玩具或吃東西，
當我地使出轉移視線或拋糖引仔等計仔既時候，弟弟爭到既玩具都會放番低，
佢地要一齊玩同食，最後係兩個都會遺棄果件玩具。
在嶺南大學迎月晚會，話劇傳來了一句普通話對白「…知道嘛？」
阿仔大大聲作出回應：「知道！」引來了全場掌聲。
眼看台上一眾演員有點突然，為免話劇受到影響或視線轉移，
我和太太互望一眼，選擇了一個動作──閃 (立刻離開)。
在回家的車程中，我問太太：「好像很久沒有話劇了，是嗎？」
太太回答：「實在是很久了，阿仔四歲，最少是四、五年前的事了。」
我努力在腦海中尋找一起看話刻的片段，但絲毫也找不著；
於是問太太：「應該是幾年前的事情了，阿仔都未出世，你還記得最後一次看的是甚麼話劇嗎？」
太太想了一會，似乎也沒有記憶；
就在這時，阿仔回應了一句：「我不記得啊！」
我和太太笑到反轉，也停止了這話劇的話題。
有一位剛會考完取不到任何分數的學生致電給我，說：「我打算向毅進退學。」
我回答說：「吓！？」我禁止自己衝動回應，於是問：「毅進都未開學，做乜就要退學呢？有其他打算嗎？」
「有一位朋友告訴我，讀毅進不如專攻英文… 他勸我不如入xx保險公司裡面做五年，然後就可以報讀甚麼"經濟策劃師"碩士課程。」
我開始按捺不住，答道：「你千萬不要退學呢！先讀毅進一年吧，你先取得政府承認會考五科合格的資格，之後你讀書還是做任何工作我也不管了。」
「那個朋友對我說，入xx公司可以有收入喎，邊做邊學，佢話讀完毅進都冇用，不如準備五年後可以直接讀碩士好過啦，你覺得咁樣唔係好一點嗎？」
我不得已要加強十倍語氣：「唔係啩，你唔好咁蠢比人呃喇！你諗諗，你現在二十歲，要工作的話，到退休六十五歲，有四十幾年，到時仲唔夠做咩？五年不是一個短時間，你讀中學讀左咁耐都只係五年咋；投資一年容易，還是投資五年容易？」
「…」
見佢諗緊，我追殺下去：「你醒一醒啦！一般人讀完中五，要讀兩年預科，再讀三年大學，成績好先至可以讀碩士；你會考零分，係咪咁簡單五年後就入到碩士呢？你讀完毅進，起碼有政府承認你中五畢業，你入果間保險公司，仲係第一份工, 萬一你開唔到單, 到時炒魷魚出左黎就乜都冇, 得中三，點算？」
「五年…我可以堅持啫…」
「朋友，你唔掙在讀完呢一年毅進先去做野啦，讀完呢一年，我唔理你讀書定做野, 但時間過左就冇得返轉頭。到時入唔返毅進…你就剩低零分, 乜都冇… 做工都唔掙在讀埋呢一年… 你明白我說甚麼嗎？」
「我明… 等我再考慮一下先啦… 拜拜…」
「…」
每次同呢個學生傾偈，我都一額汗，我驚我個仔都係咁… 就慘咯…
時間過左就返唔到轉頭，到時條路就好難行。
好，即刻出去同阿仔認字先…
(阿仔現時只得四歲)
今朝7點半，忽然聽到阿仔叫：「爸爸，流鼻血呀！」
坐在疏化上的我立即彈起，走去扶他坐下，讓他低下頭來, 我一手拿著紙巾抹去鼻血, 另一手按實他的鼻樑，
看見他略帶驚惶的臉容，我安慰他說：「不要緊的，每一個小朋友都試過流鼻血的，爸爸小時候流得很多次，媽咪鼻膜薄，流得更比爸爸多。」
一會兒，鼻血乾了, 停了，我放開手，囑咐他：「你要用口呼吸，不要用鼻呼吸, 知道嘛？」阿仔點頭，說：「知道。」
誰知不到兩分鐘，他又開始流鼻血，流的比之前更多，於是止血的程序又進行了一次，按鼻樑的時間延長了。
我留意到他有一點兒鼻塞，於是再次叮囑他：「記住，要用口呼吸，不要大力用鼻呼吸, 可以嗎？」阿仔又點頭，說：「可以。」
不到五分鐘，他又流鼻血，血如柱下, 比前多得很；我開始擔心了, 再一次止血後，我慎防他用鼻子呼吸, 於是便用一小撮紙巾塞住他的鼻孔。
塞了一會，他極不喜歡, 希望我將之取走；我說：「不能拿走, 恐怕你隨即又流鼻血。」
擾攘了數分鐘，他自行取走了，果然，血又從鼻孔出來, 三番四次, 一次比一次多, 這次接近半條手巾仔都染紅了，我的心幾乎跳了出來，不由分說，一方面我用右手幫他止血, 另一方面失控地責罵他：「爸爸都說了不能拿走吧！你怎麼不聽爸爸的說話？」盛怒之下，左手便狂揪他的屁股去。
阿仔忍著，用了我常說的話回應我的失控：「爸爸，你嬲都沒有用的。」這句說話讓我醒悟過來。
我抱他入懷內，對他說：「阿仔，其實爸爸只是希望你不再流鼻血的，你要照爸爸的話做呢。」此時，阿仔終於忍不住淚水，大哭起來。我安慰他，給他止血，又用紙巾塞鼻，再請他食糖。
一直弄到九點正，我才帶著他回幼稚園上課。接近學校，我拿走他鼻孔的紙巾，向老師交帶幾句，便離他而去。
接著的一整天我都在擔心他。
回望這事，感受良多，我發覺內心的愛和怒交織在一起，表面雖保持鎮定，內心實在是又擔心，又驚惶，擾攘良久，仲慘過自己流鼻血。
感謝神！自九時起，阿仔整天沒有再流過鼻血。
希望兩個兒子愉快成長, 身體健康！
呈豐好似自信心唔係好夠, 又太倚賴爸爸咯。(作為爸爸的我真係覺得超開心！)
呈禧就惡死左少少, 任何物件在他手都弄壞, 快d學多d野啦，剩係識講「爸爸」, 媽咪實吃醋啦！
希望兩個兒子認識耶穌, 堅強勇敢。
經過三星期特訓，細仔呈禧終於成功學識行路！
出黎行，預左要還，
雖然算識行路，但久行必失，間中都會跌低坐响地上面。
從佢身上，真係知道咩野叫做未識行先學走，
冇人扶佢行，佢自己就慢慢來，
一有人扶住佢，佢就仆住走，有咁快走咁快，
睇住佢成長真係人生一大快事。
去完Camp，返到屋企，全家都High到震，
一入門口阿細竟然趕著扶住要行過來，
阿大成晚貼到實一實，成晚話好掛住我，
到第二晚瞓覺，講左一句：「冇爸爸我就唔瞓。」
坐在旁邊的我雖然心裡甜到漏，但始終不能助長此風，
於是回應一句：「好！爸爸要做野，你一於唔好瞓。」
由於阿仔下午去左游泳池玩左一粒鐘，實在倦透，笑了一笑，卻無意起床，
於是我勸了又勸：「唔可以咁架，爸爸唔响度你都要瞓架！知唔知道！？」
阿仔點了點頭，我坐在他身旁，過不多時，他便入睡了。
仔：「爸爸，買『龍劍道』丫。」(一套卡通片既玩具)
爸：「又買玩具？屋企好多玩具喎，咁我咪又要行路返屋企囉？」
「我鍾意你行路返屋企丫麻。」
「下，行路？點解呀？咁玩唔到撻撻撻架喎。你真係鍾意我行路返屋企？」
「係呀，唔玩撻撻撻，因為我唔想你腰骨痛。」
「真係多謝哂喎！」(但係我都係唔想買玩具喎。)
「唔駛客氣。」
尋日一早，阿仔見天氣晴朗，又想踏單車返學，
但由於我見太陽伯伯太兇猛，加上有d趕時間，又唔想送完仔返學後再送單車返屋企，
於是就同佢講：「今日天氣好曬喎，唔好踏單車咯！我地行快d返學好過啦。」
阿仔見冇單車踏，即時扁咀，响LIFT口鄒鄒眉頭，然後講左句句子：「I am so angry!!!」
我聽到都醒一醒，問佢：「WHY?」
佢竟然仲識答：「because … no bicycle…」
聽到真係嚇一跳，見佢咁叻，差DD就心軟返轉頭解開單車比佢，
不過最後都忍心起來，維持一致，避免比佢以為嬲一嬲就得米。
原來，有時候，人會在一些特別既情況下，說出一些特別既說話來，
阿仔就講左英文，佢唔嬲我都唔知佢又識多左咁多野。
得閒再試下佢先… 哈!
嘩！阿仔一生人第一次入戲院睇電影！
咁大件事，梗係要早d比定心理準備佢，等佢開心耐d啦，
早左足足一個星期：「阿仔，我地下個星期睇『功夫熊貓』，好唔好呀？」
「好呀，幾時呀？依家？」
「唔係，係下個星期。」
「即係今日呀？」
「唔係今日，今日係Sunday，首歌仔點唱架.. Monday, Tuesday, Wednesday, Thursday, Friday, Saturday & Sunday… 係下個Saturday呀！」
「Saturday, 係咪聽日呀…」
「……」
話咁快到左Saturday，由於買唔到早場既緣故，我地最後買左13/7 Sunday晚上既戲飛。
「阿仔，嗱，我地聽晚睇戲呀，你今日同聽日做Good Boy，好唔好？」
「好，係咪我地聽晚睇戲呀。」
「係呀，咁你記住做Good Boy咯喎。」
「好呀！」
阿仔一直就記住「聽晚」睇戲。如是者又過了一晚，第二朝返教會，阿仔同兒拜既姨姨講：「姨姨，我地「聽晚」睇『功夫熊貓』呀！」
甚至去到戲院，阿仔都仲講緊：「爸爸，我地係咪聽晚睇『功夫熊貓』呀。」
「唔係聽晚，我地而家睇，好唔好？」
「好嘢！睇功夫熊貓！」
阿仔未搞清楚咩野叫「尋日」、「今日」同埋「聽日」，但終於都唔駛再等，成晚超開心，
睇完戲開心之餘，仲响果晚一夜之間賴左兩次尿。
網站標題 